તાજેતરમાં ભોજપુરી ઈન્ડસ્ટ્રીમાંથી ચોંકાવનારા સમાચાર સામે આવ્યા છે. ભોજપુરી ગીતકાર અને લેખક બ્રજકિશોર દુબેનું નિધન થયું છે. બ્રજકિશોર દુબેનો મૃતદેહ પટનાના પાટલીપુત્ર પોલીસ સ્ટેશન વિસ્તારના કેસરી નગર વિસ્તારના એક ઘરમાંથી મળી આવ્યો હતો. બાથરૂમમાંથી મૃતદેહ મળ્યા બાદ ગભરાટનો માહોલ છે. બ્રજકિશોર દુબેના મૃતદેહ પાસે એક સુસાઈડ નોટ પણ મળી આવી છે, જેમાં તેમણે આત્મહત્યાની જવાબદારી પોતાના માથે લીધી છે અને કોઈને દોષ આપ્યો નથી.
જો કે, બ્રજકિશોર દુબે બાથરૂમમાં ખૂબ જ શંકાસ્પદ હાલતમાં મળી આવ્યા હતા. તેમના પગ બાંધેલા હતા અને માથું પાણીથી ભરેલા ટબમાં હતું. તેમજ બાકીનું શરીર ખુરશી પર હતું. મૃતદેહને આટલી શંકાસ્પદ હાલતમાં જોઈને પોલીસ હત્યા અને આત્મહત્યા બંને પાસાઓથી કેસની તપાસ કરી રહી છે. બ્રજકિશોર દુબેના પરિવારજનોએ આ કેસમાં હત્યાની આશંકા વ્યક્ત કરી છે. તેમનું કહેવું છે કે જે ઘરમાં તેમનો મૃતદેહ બાથરૂમમાંથી મળ્યો તે તેના મિત્રનું છે
અને તે ક્યારે અને કયા હેતુથી ત્યાં ગયા તેની તેમને જાણ નથી. ત્યાં ઘટનાની તપાસ કરી રહેલા પટનાના કાયદો અને વ્યવસ્થાના ડીએસપીએ કહ્યું કે આ આત્મહત્યાનો મામલો લાગે છે, કારણ કે એક સુસાઈડ નોટ મળી છે, જેમાં ગીતકારે કોઈને જવાબદાર ઠેરવ્યા નથી. પરંતુ અમે હત્યા અને આત્મહત્યા બંને મુદ્દા પર કેસની તપાસ કરી રહ્યા છીએ. હાલમાં પોસ્ટમોર્ટમ રિપોર્ટ આવ્યા બાદ જ કંઈક સ્પષ્ટ થઈ શકશે. અનેક મુદ્દાઓની તપાસ કરવામાં આવી રહી છે. કેટલાક લોકોની પૂછપરછ પણ કરવામાં આવી રહી છે.
જણાવી દઈએ કે બ્રજકિશોર દુબે મૂળ રોહતાસ જિલ્લાના હતા. તેમને બિહારના સંગીત ક્ષેત્રે તેમના યોગદાન બદલ રાષ્ટ્રપતિ દ્વારા સંગીત નાટક અકાદમી એવોર્ડ એનાયત કરવામાં આવ્યો હતો. બ્રજકિશોર દુબે લોક ગાયક હોવાની સાથે સાથે સારા ગીતકાર પણ હતા. તેમણે ઘણી ભોજપુરી ફિલ્મો માટે ગીતો લખ્યા હતા. ભોજપુરી એકેડમીમાંથી આસિસ્ટન્ટ ડિરેક્ટરના પદ પરથી નિવૃત્ત થયેલા બ્રજકિશોર દુબે આકાશવાણી પટનામાં પણ જોડાયા હતા.