65 વર્ષીય બ્રાઝિલિયન મિલિયોનેર કે જેણે તાજેતરમાં જ એક સ્કૂલ ગર્લ સાથે લગ્ન કર્યા છે તેણે જોરદાર પ્રતિક્રિયાનો સામનો કર્યા બાદ નોકરીમાંથી રાજીનામું આપી દીધુ છે. બ્રાઝિલના મેયર હિસામ હુસૈન દેહેનીએ 15 એપ્રિલના રોજ પૂર્વ ચાઇલ્ડ બ્યુટી ક્વીન કૌએને રોડ કેમાર્ગો સાથે લગ્ન કર્યા હતા. કેમાર્ગોએ 16 વર્ષ પૂરા કર્યાના માત્ર 4 દિવસમાં જ દેહેની સાથે લગ્ન કર્યા.
મિલિયોનેર બિઝનેસમેન દેહેની પાસે 14 મિલિયન બ્રાઝિલિયન રિયાલ (આશરે 22 કરોડ)ની સંપત્તિ હોવાનો દાવો કરવામાં આવે છે. આ દરમિયાન તેઓ પરાના પ્રાંતના અરાકુરિયાના મેયર તરીકે તેમની બીજી ટર્મ પૂર્ણ કરી રહ્યા હતા. મીડિયા રીપોર્ટ અનુસાર, દેહેનીએ તેમના લગ્નના કારણે સિદ્દાનીયા પોલિટિકલ પાર્ટીમાંથી રાજીનામું આપવું પડ્યું હતું.
આ ઘટના દરમિયાન બીજી એક વિચિત્ર વાત સામે આવી છે કે દેહેનીએ લગ્ન પહેલા જ દુલ્હનની માતા અને તેની આંટીને ટોચની નોકરીઓ આપી. કેમાર્ગોની 36 વર્ષીય માતાએ તેની નવી નોકરીમાં $1,500 નો જંગી વધારો મેળવ્યો હતો. તેઓ સંસ્કૃતિ અને પર્યટનના મ્યુનિસિપલ સેક્રેટરી છે. મેલ ઓનલાઈન અહેવાલો અનુસાર કેમાર્ગોની આંટીને સેક્રેટરી જનરલના હોદ્દા પર નિયુક્ત કરવામાં આવી.
બંને મહિલાઓને હાલ માટે તેમની નોકરીમાંથી બરતરફ કરવામાં આવી છે અને સત્તાવાળાઓ તપાસ કરી રહ્યા છે કે શું દેહેનીએ તેમના હોદ્દાનો દુરુપયોગ કરી તેમને નોકરી અપાવી છે કે કેમ. દેહેની 16 બાળકોનો પિતા છે અને તેણે 6 વખત લગ્ન કર્યા છે. તેણે 1980માં પ્રથમ વખત લગ્ન કર્યા હતા.
પૂર્વ મેયર વિશે એવી માહિતી પણ બહાર આવી છે કે તેઓ વર્ષ 2000માં ડ્રગ્સની હેરાફેરીમાં જેલમાં ગયા હતા. તે લગભગ 100 દિવસ જેલમાં રહ્યા બાદ તપાસ બંધ કરી દેવામાં આવી. બ્રાઝિલમાં 16 વર્ષની ઉંમરે લગ્ન કરવો ગુનો નથી પણ માતા-પિતાની ઈચ્છા અનુસાર લગ્ન કરવા એ કાયદેસર છે.
આ દેશ વિશ્વના ટોચના 5 દેશોમાં સામેલ છે જ્યાં સૌથી વધુ સગીર લગ્નો થાય છે. દેહેનીની 16 વર્ષની પત્ની હજુ સ્કૂલમાં છે અને તે સોશિયલ મીડિયા પર લખી રહી છે કે તેમના લગ્નનો દિવસ અત્યાર સુધીનો સૌથી ખુશ દિવસ હતો.